Friiqentli Äskd Questschons

Froge & Antworte

Wenn spilä QL ändlech bi mir ir Umgäbig?

Dr eifachscht Wäg, usezfinde wo und wenn QL spilä, isch: du luegsch hie uf dr Homepage under "Termine".

 

Ig wett es Outogramm vo «QL», wie mach I das?

Das isch sehr eifach: Schick eifach äs E-Mail am Webfuzzi.

 

Werum spilet Dir das Johr nid am Open Air XY / Spilet doch mou z'XY

Es isch jo nid eso, dass mir eifach zum'ne Veranstalter gö und säge "Hey! Mir spile de das Johr bi Dir"! Damit me cha amene Open Air oder Festival spilä, muess me vom Veranstalter iiglade wärde. Auso, wenn Du wottsch, dass QL am Heitere Open Air (aus Bispill) spile, de muesch am Veranstalter schribe, und ihm säge, dass Du findsch, dass das Festival nume ä Knüller wird, wenn QL ufträtte (oder ähnlech). Vilich hilfts sogar! ;-)

 

Ig ha bald Geburtstag/Hochzyt/Toufi/Konf/Barmizvah/oder ähnlichs: Chöme QL zu mir cho spilä, am liebschte akustisch, und gratis natürlech - es git derfür öppis z'ässe und z'trinke und es guets Fescht...?

Grundsätzlich spile «QL» überall, ömu fasch! Bedänk eifach, dass QL ä Rock-Bänd isch, mit relativ grossem (finanzielle) Ufwand. Falls Du aber das nid schüchsch, schrib doch äs E-Mail am Roman. Akustisch spile QL nid! Das miech jo ou kei Sinn! Usserdäm würd me de plötzlich ghöre, WAS sie eigentlech spilä ;-)

 

Wie sit de Dir uf e Name «QL» cho?

Dr Tosi kennt ä Bar die heisst QN (Kuhn). Das het är am Pät verzellt. Dä het gseit, s'Wort Cool chönnt me doch ou so abchürze. Auso het me beschlosse, dass wenn me mou ä Bändname brüüchti, de wär doch das no Eine. Und wie Du jo weisch, het's de eine bruucht :-D

 

Wie sit Dir uf d'Idee Schwizer Lieder z'verpönke choo?

Uf ere Tournee in Öschtriich het üse Fründ dr Torben e CD lo loufe vo de "Me First and the Gimmie Gimmies". Die mache Pönk Versione vo alte Sixties Klassiker und Musical Songs und no vill meh! Wo mir das ghört hei, hei mir gseit "das mache mir ou!". Es paar Tag spöter hei mir üs anegsässe und es paar Lieder ufgschribe wo me wett spile. Und scho churz drufabe si mir zum erschte Mal ufträtte...

 

Was säge de Polo, Kuno, Plüsch, Span, Pepe Lienhard usw. derzue?

Auso eigentlech hei bis jetz aui gseit, sie finges no geil. Dr Polo het ja jetz sogar es Lied umgschribe für üs (Hopp Schwiiz). Aber die wäre jo ou blöd wenn sie's nid cool finde würde, schliesslech berchöme sie alli Gäld vo üs (Urheberrecht) ;-)

 

Würdet Dir öich aus "Punk Bänd" bezeichne?

Nei!! Punk wird hüt unterteilt i Punkrock, Punk'n'Roll, Poppunk, Skapunk, Politpunk, Funpunk, Melodic Punk, Skatepunk, Hardcore Punk, Deutschpunk, Cowpunk, usw. QL darf me als Funpunk Bänd bezeichne. Aber es isch eigentlech völlig Wurscht i weli Schublade me QL leit. Schluss am Änd isch es eifach Rock'n'Roll!

 

Was isch Funpunk?

Jede hett ä anderi Uffassig was Punk isch, und mit em "Funpunk" isches grad gliich. Vo üs us gseh, isch es e so: Me nimmt d'Musig vom moderne Punkrock à la Green Day, Sum 41, Offspring usw. und lot jeglechi politischi Botschafte wäg. That's it! Bispil für Funpunk Bänds si: "The Toy Dollz", "Me First And The Gimmie Gimmies" oder "The Wohlstandskinder".

 

Wo gits Noten oder Tabs vo QL

Leider gits keni Note oder Tabs von QL Songs. Es blibt dir leider nüt anders übrig, als die Songs usezlose... Aber si mir ehrlech, sooo schwirig chöi die Songs jo nid si, schüsch chönnte mir se jo nid schpile ;-)

 

Werum isch eigentlech dr Stämpf nüm derbii?

Dr Stämpf hett im Januar 2011 beschlosse, e Solo Karriere z'starte. Är hett d'Humba Tätärä Quartett Tour no fertig gschpiut bis im August 2011 und hett sini Zyt mit QL mit es paar Bier und anderne Körperflüssigkeite beändet. :-)

 

Werum isch eigentlech dr Urs nüm derbii?

Dr Urs hett QL us persönliche Gründ im Juli 2005 verloh. Die Entscheidig isch nach ere längere Diskussion mit dr ganze Bänd gfalle - wie jedi Entscheidig bimne Glas Bier... Mir hei zäme gueti Gschpräch gfüert und hei üs im Fride trennt!